Veer-Zaara (فيير زارا)
فيير الهندي البسيط بيحب زارا الباكستانية الثرية الحب المستحيل اياه, و طبعا كل الظروف فرقتهم و اتسجن فيير ظلم..وبعد22سنة, المحكمة بتفتكره و بتتحرك-محسوسية-المحامية بتاعته فتساعده يرجع لحبيبته ليقررا ضرب كل الظروف بعرض الحيطة و يتجوزوا..طب و ايه اللي كان حايشهم من22سنة فاتت؟
Don 1 (دون)
دون هو عصمت كاظم الهندي,راجل سوبر من مجاميعه وله جيرلفريند مستحملاه طول حياتها...في النهاية,بعد أن يشاع قتله ويطلع لسة عايش,تهرب معه وتظل تمضغ له الزلط علي عكس سمرة في الرجل الثاني زي ماهو مفروض يحصل أصلا,,يعني برضو مصرة تاخد علي دماغها....هو يعني الحب بيعمل كدة؟حتي لو كان راجل زي شارو خان؟
Kranti(الثورة)
أسرة كل هدفها في الحياة من أكبر فرد لأصغر واحد فيها هو مقاومة الاحتلال الانجليزي,,,,تتعرض الزوجة الحامل للتعذيب وتلد في المعتقل,وعندما يستشهد زوجها,يواسيها شقيقه بأن يقول أنه لم يتركها بمفردها انما ترك بين ذراعيها شهيد جديد من أجل الوطن............أكيد المخرج دة كان حانوتي
Kurbaan(قربان)
احسان متزوج من أفانتيكا كستار لعملياته الارهابية, يقوم باحتجازها و ترهيبها , حتي تخبره بأنها حامل....أن أن أااااان.....يكتشف أنه يحبها و تتحرك _الأبوبة_ بداخله, فيقدم نفسه قربانا للارهاب لكي تعيش هي و الجنين...راجل مضحي
Kabhi khushi kabhie gham(أحيانا فرح ,أحيانا حزن)
يطرد ياش ابنه بالتبني لزواجه ضد رغبته ويعايره بانه مش ابنه,بيتقابلوا بعد12سنة, فيقولله انو كان عايزه يرجع من أول يوم ويلومه لأنه مافكرش يسأل عليه طول المدة دي...وهو كان متوقع انو يسأل بعد دة كله؟ثم ايه اللي كان حايشو هو انو يسأل؟أو حتي يبعتلو كلمني شكرا؟
Bobby(بوبي)
يهرب العاشقان راج و بوبي من والديهما قبل اتمام زفاف راج لابنة شريك والده, تطاردهما عصابة فيقفزان الي النهر ..ينقذه والد بوبي وينقذها والد راج, فتاخدهم -الأبوبة-ويباركوا جوازهم اللي كانوا محرمينه تحريما باتا من أول الفيلم....أنا لو اعرف كدة كنت زقيتهم في المية م الأول و خلصنا
Saajan(الحبيبة)
يكتشف أكاش العابث أن صديق عمره يحب نفس الفتاة من قبل أن يعرفها هو ويحبها,فيتنازل له عنها بمنتهي طيب الخاطر وهو فرحان ومزقطط ع الأخر دون اي نوع من الألم, ويعود لحياة الهلس مرة أخري...مع ان البنت (مادهوري ديكشيت) ماهياش مارلين مونرو يعني.....كنت حاسة اني قاعدة بتفرج علي فيلم عربي..عربي بحت
Fashion(موضة)
تهرب ميغنا من أسرتها لتصبح سوبر موديل,فتواجه الطريق الحافل بالأشواك وتقع في(الختشيئة).تعود لأسرتها من جديد وكأن مفيش أي حاجة حصلت..لأ,وبعد ما انحسرت عنها الأضواء,جاتلها دفعة تفاؤل رباني كدة ماعرفش ازاي وقررت تستمر والدنيا أصلا خربانة خربانة...ياللا,المخرج بس ماحبش يزعل الموديلز,طول مافيه حياة لازم يبقي فيه تفاؤل
Aitbaar(الثقة)
بعد أن تكتشف نيها ان زوجها هو من اراد قتلها,وأنه كان يخونها,وهو من أحال حياتها الي جحيم, لا تجد الا أن تبكي وأسندت رأسها بحسرة الي جثته بعدما مات وهي تشكو لوعة خيانة حبيبها....هو دة اللي ربنا قدرها عليه؟طب كانت حتي ترزعه قلمين طيب؟ طب قلم واحد حتي؟؟؟
Shahenshah(شاهينشاه)
يقع الشرطي فيجاي في حب النشالة شالو (و نعم العروسة ) ,بينما هي منفضاله و بتحب البطل المقنع شاهنشاه..تكتشف ان فيجاي هو نفسه شاهنشاه فتحبه علي طول من غير تفكير..دة البني أدم اللي بيسموه قلبل الأصل,,,اللي بيسيب الأصل و ياخد الصورة
Zameer(الضمير)
تشعر بوجا المراهقة التافهة بتأنيب الضمير لأنها كانت السبب في رقود الفتاة سوبريا بين الحياة و الموت و خدت منها حبيبها سوراج و اتجوزته....فتنتحر بعد انجابها و ترسل ابنتها الي سوبريا اللي بتخف علي طول أول ما بتشوف البنت في اللفة بعد ماكانت خلاص ميتة ميتة....و سوراج بيتجوز سوبريا و يربوا البنت سوا....أما بنت فيها البركة صحيح.........بعدين هو يعني حد ينتحر عشان أجاي ديفجان؟؟؟؟؟ دي عميا
Duplicate(طبق الأصل)
يستغل المجرم مانو الشبه الكبير بينه و بين الشاب الطيب بابلو في الافلات من البوليس الذي يطارده...يظل يؤذي الجميع و يكاد أن يفتك ببابلو وحبيبته و عرابته, فتقتله عشيقته التي ضاقت بحياة الاجرام و تبكي حبيبها المجرم وهو ميت لتقرر أن تكون كبش فداء القصة هكذا فجأة...ويبارك الجميع زواج بابلو بحبيبته كأي فيلم عربي قديم حفظناه صم.......الصراحة ضمير العشيقة اللي صحي فجأة دة جه في وقته و الله...لولاها ماكانش الفيلم قفل من أصلو
Kab tak chub rahungi
زوج يخون زوجته ويجلب عشيقته واختها ليعيشا ببيتهما وهي تخدمهم, ويمنعها من زيارة والدها المريض حتي يموت وهو لا يكترث, و يجبرها علي استنزاف اموال والده..وهي راضية ومستحملة ورافضة تدخل الخادم اللي بيحبها وتقول له انه مجرد خادم..يعرف والده فيستعوض ربنا فيه و يموت الزوج وتهرب العشيقة بأختها و يتبني الاب الخادم ويزوجه من الزوجة...ودة بيثبت نظرية فارس بلا جود بأن المشكلة اصلها مش مشكلة يبقي فين المشكلة؟؟؟مافيش مشكلة
Dil se(من القلب)
أمار يعرف ان حبيبته ميغنا عضوة في عصابة ارهابيين و يعرف أنهم يستغلونه..لكنه يحبها و يتحمل و يحاول اثنائها عما تفعله....بيتذل و يتضرب و يتمرمط و يتمسح بكرامة امه الأرض بسببها ومع ذلك برضو بيروحلها و بيصر عليها و يمضغ لها الزلط...بتكون هي لابسة قنبلة تحت الهدوم..يحاول معانقتها فتدفعه بشدة وتقاومه ...ويتذلل ويتوسل ويترجي أن تأخذه معها ..و بعد كثير من التذلل تتأثر هي وتعانقه فتنفجر القنبلة بيهم هما الاتنين...أهي خدتك معاها يا حلو..مبسوط؟؟؟؟؟ و بعدين تستاهل عمي ف عينك ع الأشكال اللي بتحبها دي
Jurm(جرم)
أفيناش ينتفم من زوجته و صديقه بمعاونة سونيا التي تحبه في صمت طوال الفيلم , بينما هو لا يستطيع أن ينسي حب زوجته و يكويه غدرها. و بعد الانتقام, يكتشف فجأة كدة أنه يحب سونيا اللي هية أصلا قدامه بقالها قرن..و راح قالب مراته ف ثانية
Nagin(الأفعي)
ست أصدقاء يقتلون ثعبانا برصاصة خايبة.تتحول أنثاه الي امرأة فاتنة لتنتقم منهم, ورصاص الدنيا كله مش محوق فيها...وبعد قتل خمس رجال,تسقط سقطة خايبة جدا وهي بتحاول تقتل السادس اللي انكتب له عمر جديد بفضل الله والمخرج..وأثناء الاحتضار تقول أنها اكتشفت وياللهول أن نار الانتقام مؤلمة...يا راااااجل؟؟؟؟
Kabhi alvida naa kehna(لا تقل وداعا أبدا)
يضبط سام العربيد مايا زوجة ابنه الوحيد متلبسة في أحضان ديف المتزوج , راح طب ساكت و نقلوه العناية المركزة ,وقد أدرك أن مايفعله ببنات الناس هيطلع عليه, فسامحها بدون تفكير و تم طلاق الأربعة بعد موته...لكن زوجة ديف وزوج مايا ناس سبور خالص فنصحا مايا باللحاق بديف قبل سفره..طبعا,ماهي خيانة بس ,مش حاجة يعني...و وجدته بعد ان بدأ القطار يتحرك بالفعل, فقفز من القطار زي الأفلام العربي وجالها....دة أنا بقة اللي كنت هطب ساكتة ساعتها
Baazigar(المقامر)
تعرف بريا حقيقة حبيبها فيكي,وأنه أصلا اسمه أجاي,وانه قتل أختهاوصديقيها رافي و أنجالي,ومابيحبهاش من أصلو انما بيستغلها زي اختها عشان ينتقم من أبوهم اللي اتسبب في تعاسة عائلته و اصابة والدته بالشلل..ومع ذلك بتعذره وتقف في صفه ضد ابوها.و ما ان تري الأم ذلك الرجل الذي تسبب في تعاسة العائلة , فتشفي علي الفور ما شاء الله , طب كنتو وروهولها من أول مشهد و بكدة مش هيبقي فيه فيلم من أصله...مش بس كدة ,بريا بتقلب ابوها قلبة سودة أول مايلقي حتفه, بينما تبكي بحرقة لما يموت حبيبها وهوة بيقتله...تستاهل بقة,هنعمل ايه؟
Darr(الخوف)
راهول مجنون بكيران, يعرف عريسها سونيل فيشتبكوا مع بعض و يروح راهول دابب فيه طعنتين يموتوا فيل..و مع \لك الراجل لسة واقف علي حيله و مابيقعش حتي...بعدها يحاول راهول اختطاف كيران لكنه يهدأ كالطفل الصغير لما تضحك عليه و تقولله انها هتتجوزه (بيفكرني بقناوي بتاع فيلم باب الحديد ) فيروح سبع الرجال سونيل جاي و لا كأنه مطعون ولا اي حاجة و يقعدوا يضربوا في بعض شوية و بعدين يشهر مسدسه في وش راهول و هو واقف و كأنه مستنيه......و أخيرا زيست..تنطلق رصاصة خايبة جدا عشان تعمل لراهول اللي فشل الضرب في عمله......البقاء لله يا جماعة
Devdas(ديفداس)
يصاب ديفداس العاشق باليأس بعد زواج حبيبته بارو فيدمن الخمر حتي ينزف فمه دماءا و يحذره الطبيب قائلا أنه اذا شرب قطرة أخري فسوف يموت , يقابل صديق عمره الذي لا يعرف بما قاله الطبيب , فيعرض عليه كأسا قائلا انه سوف يعدمه لو ماشربهاش , راح الواد الأهبل شربها , مش فاهمة طب كنت قولله الدكتور قال ايه يعني دة عيل قوي..يشعر بنهايته فيذهب الي بيت حبيبته و يموت شبه منتحرا أمامه لأنه فقدها للأبد..وبعدين أمال لو كان اتجوزها؟ دي كانت هتوفر عليه عناء الشرب أصلا
Anjaam(الظروف)
تخرج شيفاني من السجن للانتقام من فيجاي , فتجده كسيحا عاجزا , فتقف بجانبه و تمرضه حتي يتعافي و يسترد صحته...بعدها , وأثناء ما يعانقها عناق حار جدا .. تطعنه بخنجر خلف ظهره ويسقط علي الارض و هو لسة فيه روح...تفضل تضرب فيه ضرب مبرح و تدفعه اثناء الضرب الي الخارج حيث الجبل وهي تقول انها لم تمرضه الا لتقتله بيديها, كل دة والواد لسة عايش....تدفعه الي اسفل الجبل ليسقط فيجر قدميها معه..يخرب بيته دة بعشرين روح..تقول أنها لا يهمها ان تموت طالما ستقتله وتدفعه بقدميها ليسقطا معا ويموتا معلنة اخيرا الدفعة القاضية للناس اللي مابتموتش دي....شكرا للجاذبية الأرضية
